Ձյունաճերմակ տորթ, որի համից չեք կշտանա

Բաղադրությունը

• Խմոր

5 հատ ձու,

150 գ շաքարավազ,

130 գ ալյուր,

40 գ օսլա,

35 գ կարագ:

• Օշարակ

50 գ շաքարավազ,

100 մլ ջուր,

2 ճաշի գդալ լիմոնի հյութ:

• Կրեմ

150 գ շաքարավազ,

2 մեծ կամ 3 փոքր ձու,

420 գ բարձր յուղայնությամբ թթվասեր (20% և ավել),

300 գ կարագ,

1 տու վանիլին,

2 ճաշի գդալ ալյուր:

Պատրաստման եղանակը

Կարագը հալեցնել և թողնել, որ սառչի:

Ձվի դեղնուցը և սպիտակուցը միմյանցից առանձնացնել:

Սպիտակուցը հարել, մինչև կփրփրի, իսկ հետո գդալ-գդալ ավելացնել շաքարավազը՝ յուրաքանչյուր անգամ հարելով:

Այս հարված զանգվածը պետք է շատ կայուն ստացվի: Դրանից հետո հատ-հատ ավելացնել դեղնուցները, և ամեն անգամ մի փոքր հարել:

Ալյուրը և օսլան խառնել, մաղով անցկացնել և մաս-մաս ավելացնել ձվով ստացված զանգվածի մեջ: Խառնել զգուշությամբ՝ ներքևից դեպի վերև: Այնուհետև ավելացնել հալեցրած կարագը և նույն կերպ խառնել:

Ջևամանի (22սմ) հատակին յուղաթուղթ փռել, և խմորը լցնել դրա մեջ:

Թխել 180 ջերմաստիճանում 30-35 րոպե:

Պատրաստի բիսկվիթը թողնել, որ ամբողջությամբ հովանա, հետո հանել ձևամանի միջից: Ցանկալի է մոտ 8 ժամ բիսկվիթը թողնել սառնարանում՝ սննդային տոպրակով ծածկելով:

Օշարակը պատրաստելու համար ջուրը, շաքարավազը և լիմոնի հյութը խառնել, եռացնել, իսկ հետո թողնել, որ սառչի:

Կրեմը պատրաստելու համար խառնել ձուն, շաքարավազը, վանիլինը, 2 ճաշի գդալ մաղված ալյուրը:

Այս ամենը լավ խառնելուց հետո, ավելացնել թթվասերը, կրկին խառնել և եփել թույլ կրակին անընդհատ խառնելով:

Այս կրեմը եփելուց հետո լցնել ամանի մեջ, ծածկել սննդային տոպրակով և թողնել, որ հովանա:

Այդ ընթացքում սենյակային ջերմաստիճանի կարագը մոտ 5 րոպե հարել, իսկ հետո մաս-մաս ավելացնել եփովի կրեմը՝ զուգահեռաբար հարելով:

Բիսկվիթը բաժանել 2-3 մասի:

Յուրքանչյուր շերտ թրջել ջնարակով, հետո քսել կրեմը: Տորթն ամբողջությամբ կրեմով ծածկել և 1 ժամ թողնել սառնարանում՝ նախապես սննդային տոպրակով ծածկելով:

Այնուհետև ձևավորել ըստ ցանկության և կրկին մի քանի ժամ թողնել սառնարանում, որ կրեմն ամբողջությամբ ներծծվի:

Բարի ախորժակ