Հաղարջով տորթ: Փափուկ շերտեր և նուրբ համ

Բաղադրությունը

Խմոր

• 2 հատ ձու,

• 140 գ ալյուր,

• 30 գ կակաո,

• 160 գ շաքարավազ,

• 200 մլ կաթ,

• 50 մլ ձեթ,

• 1 թեյի գդալ փխրեցուցիչ,

• 0.5 թեյի գդալ սոդա,

• 1 պտղունց աղ:

Կրեմ

• 300 մլ թթվասեր (25% և ավել),

• 200 գ սերուցք (33% և ավել),

• 80 գ շաքարի փոշի,

• վանիլին,

• շաքարավազի հետ տրորված հաղարջ:

Պատրաստման եղանակը

Ալյուրը, կակաոն, փխրեցուցիչը և սոդան խառնել, ապա մաղել, ավելացնել աղ շաքարավազ ու կրկին խառնել:

Ալյուրով զանգվածի վրա ավելացնել կաթը և լավ խառնել այնքան, մինչև միասեռ զանգված կստացվի, իսկ հետո ավելացնել ձեթն ու կրկին խառնել:

Սենյակային ջերմստիճանի ձուն հարել, ապա ավելացնել պատրաստված զանգվածի վրա ու խառնել:

Ձևամանի (22 սմ) հատակը յուղաթղթով ծածկել, և խմորը լցնել մեջը՝ հավասարաչափ տարածելով:  Թխել 180 ջերմաստիճանում մոտ 40 րոպե: Կարելի է առաջին 30 րոպեն ձևամանը ծածկել փայլաթղթով, որպեսզի տորթի մակերեսը չչորանա:

Պատրաստի խմորը թողնել, որ հովանա, իսկ հետո բաժանել 3 մասի: Եթե ուռուցիկ հատված կա, դա ցանկալի է կտրել և հավասարեցնել:

Կրեմը պատրաստելու համար շաքարի փոշին և թթվասերը լավ խառնել, ցանկության դեպքում վանիլին ավելացնել:

Սառը սերուցքը հարել, մինչև կայուն և փրփրուն զանգված կստացվի, իսկ հետո 2-3 մասով ավելացնել թթվասերով զանգվածի վրա ու խառնել:

Առաջին շերտի վրա քսել հաղարջով զանգվածը և կրեմը՝ երկոսւն էլ հավասար տարածելով: Այնուհետև դնել 2-րդ շերտը և նորից նույն կերպ վարվել: 3-րդ շերտը ծածկել կրեմով, իսկ հետո քաոսային ձևով հաղարջով զանգվածից լցնել՝ գդալով տարածքելով կամ էլ ձևավորել ըստ ցանկության:

Տորթը գոնե 2 ժամ թողնել սառնարանում և նոր մատուցել:

Բարի ախորժակ