Կրուասան

Կրուասաններ, որոնք ամբողջական կդարձնեն Ձեր թեյի կամ սուրճի սեղանը: Դրանք ստացվում են խրթխրթան, բայց միևնույն ժամանակ շատ փխրուն, ունեն հիանալի համ և ախորժելի տեսք:

Բաղադրիչներ

200 մլ տաք ջուր
200 մլ կաթ
1/3 թեյի գդալ աղ
1 ճաշի գդալ շաքարավազ
10 գր խմորիչ
2 ճաշի գդալ բուսական յուղ
2 հատ ձու
750–800 գր ալյուր
180 գր կարագ
1 տուփ եփած խտացրած կաթ

Պատրաստման եղանակը

Կաթը մի փոքր տաքացնել, ավելացնել ջուր, աղ, շաքարավազ և խմորիչ։ Խառնել, փակել սննդային տոպրակով և թողնել մոտ 8–10 րոպե։
Ստացված խառնուրդին ավելացնել բուսական յուղ, ձու (1 հատ ձվի դեղնուցը նախապես առանձնացնել)։ Ավելացնել ալյուրը, և հունցել խմորը։
Փակել սննդային տոպրակով, այնուհետև ծածկել սրբիչով։ Թողնել այնքան ժամանակ, մինչև որ խմորը իր չափերից 2–3 անգամ մեծանա:
Բաժանել խմորը 10–12 մասի, գնդել և ծածկել սրբիչով։
Յուրաքանչյուր մասը գրդնակել (մոտ 3մմ հաստությամբ), վրան բարակ շերտով կարագ քսել և փակել հաջորդ խմորի շերտով։ Կրկնել նույն հերթականությամբ։ Այնուհետև վրան մի փոքր ալյուր շաղ տալ և կրկին գրդնակել (մոտ 5–6մմ հաստությամբ)։
Խոհարարական դանակի օգնությամբ բաժանել խմորը 20–24 երկարավուն եռանկյունների, այնուհետև յուրաքանչյուր մասի մի ծայրին փոքր կտրվածք անել, և վրան մեկ թեյի գդալ եփած խտացրած կաթ դնել։
Փաթաթել խմորը՝ սկսելով եռանկյան փոքր կողմից դեպի սուր ծայրը։
Կրուասանները դնել յուղաթերթով ծածկված ձևամանի մեջ, և մի մասի վրա քսել առանձնացված ձվի դեղնուցը։
Դնել ջեռոցը 30–35 րոպե 180° C ջերմաստիճանում։ Հանել և շաքարի փոշի շաղ տալ այն կրուասանների վրա, որոնց վրա մինչ թխելը դեղնուց չէիք քսել։